Tanong Ng Sawi

Paano?
Paano mo nakakayang tabihan siya sa isang madilim na sulok
Habang nanunood ng paborito niyong pelikula
Samantalang mag-isa akong nakaupo sa sulok
Ng dilim at liwanag
Ng sakit at pait?
Paano mo nakakayang hawakan ang kamay niya habang hinihintay kita
Na saluhin ang puso kong nahulog, gumulong palayo
At gumulong muli pabalik sa'yo?

Saan?
Saan mo dadalhin ang puso kong naligaw
Kakahanap ng daan palayo sa iyo, sa atin?
Saan ako kakapit ngayong ikaw ay bumitaw?

Sino?
Sino ang lalapitan ko
Ngayong wala ka na sa piling ko?
Sino, sino ba ako ngayon sa'yo?

Kailan?
Kailan ko matatanggap na tapos na
Tayo, ikaw, ako?
Kailan ko matatanggap na iba na
Ang gusto mong kasama?
Kailan ko maiisip na huwag ka nang isipin?
Kailan ko maaalalang huwag kang alalahanin?

Ilan?
Ilang beses kong uumpugin ang sarili ko
Sa pader ng katotohanang, "Lintik, wala ka na"?
Ilang beses akong luluha
Bago ako malunod sa reyalidad na wala na tayo?
Ilang bote pa ang hahalikan ko
Para mawala ang pakiramdam ng labi mo sa utak
Kong masyado nang gamit na gamit kakaisip sa'yo?
Ilang history books pa ang babasahin ko
Hanggang sa matauhan akong hindi lang tayo ang may nakaraan?
Ilang kanta pa ang pakikinggan ko
Upang hindi ko na marinig ang ugong ng tinig mo
Dito sa puso at isip ko
Na walang ginawa kundi isipin at mahalin ka?

You Wanna Be

You wanna be loved the way you love
You wanna be held the way you hold
You wanna be hugged the way you hug
You wanna be kissed the way you kiss
You wanna be seen the way you see
You wanna be called the way you call
You wanna be owned the way you own
Tell me darling,
If you wanna feel how you make others feel
Shouldn't you be loving yourself
Instead of asking it from anyone else?

Wala Sa Kanila

Kung aasa ka lang sa ibang tao

Masasaktan ka

Mahihirapan ka

Maiinis ka

Kung hihintayin mong paligayahin ka ng iba

Maiinip ka

Mabuburyo ka

Mababadtrip ka

Huwag mong idepende

Ang kasiyahan at kalakasan mo sa iba

Hindi sila ang humihinga para sa'yo

Hindi sila ang nagpapalamon sa'yo

Hindi sila ang nagpinta ng buhay mo

Wala sa kanila ang saya at pag-ibig

Wala sa kanila ang huling tinig

Wala sa kanila ang lihim na iyak

Wala sa kanila ang sakit ng bawat yapak

Ikaw, ikaw ang nakakaramdam ng lahat

Ikaw ang nakakakita ng dapat

Ikaw ang nagbibigay kulay sa lahat

Ikaw lang

PANGAKO

Nangangako ako na kailanman ay hindi na ako huhugot pang muli. 
Bakit pa diba? E tapos na. Nagawa na. Nasaktan na. 
Para saan pa? Para ano pa?
Kung ang tanging mahuhugot ko lang naman din ay ang
malulungkot na ala-ala ng daang tinalikuran mo, 
ng daang tinalikuran natin. 
Pero baka maganda ring hugutin ko na 'to.
Kaya sa huling pagkakataon, mahal ko. 
Hayaan mong hugutin kita sa nakalipas at 
tuluyang ibaon ang pag-ibig na kumupas. 
Pangako, ito na ang huling pangakong ipapako ko. 
Pangako.