AKO NA ANG NAGSASABI

Hindi mo ako mahal

Baka napapasaya lang kita

Kasi puwede mo akong kausapin

Sa lahat ng bagay 

Tulad ng tama ba ang corporal punishment o hindi?

Sirena ba talaga yung nakita ng mga scientists o joke lang?

Hanggang sa, anong latest music ng banda na 'to

Tapos na-alala ko nga, napunta pa tayo sa usapang UFO at Conspiracy Theory

Nagsasalungat tayo ng mga ideya pero masarap ka pa ring kapalitan ng ideya

Sabi nila, "opposites attract" daw 

Pero baka hanggang attraction lang

Hindi naman lahat ng attraction nagtatagal, diba?

Kaya hindi mo ako mahal

Baka ako lang yung nagkakataon na online 'pag online ka rin

Tapos sakto na-seen ko yung message mo

Tapos ayun, doon na nagsisimula

Stickers, cheesy lines, links sa mga paborito mong kanta at kung anu-ano pa

Nakakakilig, nakakatawa, nakakainis

Pero hindi mo ako mahal

Baka masaya ka lang na may kalandian ka

Ako kasi 'yung tipo ng tao na isang text mo lang, reply agad

'Yung tipo ng tao na kukulitin ka kapag 'di ka na nagre-reply

'Yung tipo ng tao na kapag sinabihan mong "nalulungkot ako. I wanna die."

To the rescue ako para masiguradong okay ka lang

'Yung tipo ng tao na napa-paranoid kapag active ka 1 min. ago tapos 'di ka nag-chat sa akin

'Yung tipo ng tao na iniisip kung magagalit ka ba kapag may sinabi ako

Pero hindi mo ako mahal

Baka ako lang 'yung taong kayang saluhin lahat ng latak sa pagkatao mo

Kapag nagtatampo ka dahil nag-send ako ng jejemon text sa iyo

Kapag naiinis ka dahil nababa ko 'yung tawag mo

Kapag hindi ka mamamansin kasi hindi ako kumain sa tamang oras

Kapag naiinis ka sa pamangkin mo

Kapag nagagalit ka sa nanay mo

Kapag natatawa ka sa mga bagay na seryoso na halos ikamatay ko na kasi ang cool para sa'yo

Pero hindi mo ako mahal

Baka concerned ka lang

Pwede ka naman kasing maging concerned without romantic feelings attached, diba?

Kaya hindi mo ako mahal

Baka na-miss mo lang magkaroon ng girlfriend

Nagkataon, single ako at walang iniintindi

In short, available ako 

Available  na available

Pero hindi mo ako mahal

Ako na mismo ang nagsasabi

Hindi mo ako mahal

Pero baka mahal mo ako

Pero paano kung hindi?

Paano kung oo?

Bakit hindi? Bakit oo?

Mahal mo ba ako?

Mahal mo?

Mahal lang?

Ano ba ang mahal para sa'yo?

Ano ba ang pag-ibig para sa'yo?

Ano ba ako sa'yo?

Ano ba tayo?

May tayo ba?

Baka hindi mo nga talaga ako mahal

Baka nalilito ka lang

Baka importante lang ako

Pero hindi mahal

Hindi mo mahal

Hindi.