Wala Sa Kanila

Kung aasa ka lang sa ibang tao

Masasaktan ka

Mahihirapan ka

Maiinis ka

Kung hihintayin mong paligayahin ka ng iba

Maiinip ka

Mabuburyo ka

Mababadtrip ka

Huwag mong idepende

Ang kasiyahan at kalakasan mo sa iba

Hindi sila ang humihinga para sa'yo

Hindi sila ang nagpapalamon sa'yo

Hindi sila ang nagpinta ng buhay mo

Wala sa kanila ang saya at pag-ibig

Wala sa kanila ang huling tinig

Wala sa kanila ang lihim na iyak

Wala sa kanila ang sakit ng bawat yapak

Ikaw, ikaw ang nakakaramdam ng lahat

Ikaw ang nakakakita ng dapat

Ikaw ang nagbibigay kulay sa lahat

Ikaw lang

PANGAKO

Nangangako ako na kailanman ay hindi na ako huhugot pang muli. 
Bakit pa diba? E tapos na. Nagawa na. Nasaktan na. 
Para saan pa? Para ano pa?
Kung ang tanging mahuhugot ko lang naman din ay ang
malulungkot na ala-ala ng daang tinalikuran mo, 
ng daang tinalikuran natin. 
Pero baka maganda ring hugutin ko na 'to.
Kaya sa huling pagkakataon, mahal ko. 
Hayaan mong hugutin kita sa nakalipas at 
tuluyang ibaon ang pag-ibig na kumupas. 
Pangako, ito na ang huling pangakong ipapako ko. 
Pangako.

HOY, TAMAD. PARA SA'YO 'TO.

Bawal kang maging tamad. 

Hindi ka pwedeng tamarin. 

Hindi ka naman pagod e. 

Nag-aral ka lang naman. 

Umattend ka lang naman ng mga meetings. 

Nag-thesis ka lang naman. 

Kasi tamad ka. 

Tamad kang gawing proud ang mga magulang mo sa'yo kasi hello, lagi ka lang namang nasa school para sa events. 

Tamad kang magpursigi sa pag-aaral kasi tatlong kape lang naman ang nainom mo para manatiling dilat hanggang alas-singko ng umaga para matapos lahat. 

Kaya hindi ka pagod, tamad ka. At ang tamad, hindi napapagod. Kasi nga tamad, ano ba. 

Para sa'yo, para sa akin, na laging nasasabihang tamad, huwag kang mag-alala. 

Katawan lang natin ang tamad. 

Pero ni kailanman, hindi sila magkakaroon ng ideya kung gaano ka-sipag 

ang puso't isip natin na intindihin at mahalin sila. Diba ma?

KUNG HINDI NA, AKO PA RIN BA?

Minsan, naiisip ko, paano kung hindi na ako

Paano kung hindi ko na kaya

Paano kung hindi ko na gusto

Kung hindi na kita pwedeng isama sa mga lakad ko

Kung hindi na kita kayang ilibre sa Starbucks

Kung hindi na kita gustong dalhin sa Maginhawa

Ako pa rin ba?

Kung hindi na kita kayang pakainin ng pizza sa S&R

Kung hindi na kita kayang bilhan ng G-TEC 

Kung hindi na kita kayang bitbitin sa simbahan

Ako pa rin ba?

Ako pa rin ba ang pipiliin mo?

Ako pa rin ba ang mananaig?

Ako pa rin ba ang matitira?

Kung hindi na ako lahat ng ako ngayon

Ako pa rin ba ang pipiliin mo na makasama maghapon?

Isipin mo ako at ako lang

Hindi kasama ang pera, pag-aari at luho

Isipin mo ako at ang pagmamahal ko

Ako at ang mga kalokohan natin

Ako at ang mga pinagsamahan natin

Ako at ang mga pinag-awayan natin

Kung ito na lamang ang matitira

Ako pa rin ba?